4603

Air Greenlandip ujaasinermi annaassiniarnermilu qulimiguuliutai nutaanik atortulersorneqalerput

 

Air Greenland aamma Illersornissaqarfimmi atortunut pisinianermullu aqutsisoqarfik (FMI) isumaqatigiissuteqarput qulimiguullit ujaasinerni annaassiniarnernilu atorneqartut atortorissaaruserneqassasut, taamaalilluni infrarødimik assiliissutit (FLIR) isarussallu taartumi takusaqarsinnaasut (NVG) atorlugit inuit ajornartoortut ajornannginnerusumik nassaarineqarsinnaallutik.

 

Atortorissaarutit FLIR aamma NVG qulimiguulimmut G225-mut pissarsiarinissaat pillugu FMI-p Air Greenland A/S-illu isumaqatisiissutaat ungasinngitsukkut inissippoq, maannalu atortorissaarutinik pisinissamik suliaq aallartippoq.

 

Nutaanik atortorissaaruteqalernikkut ujaasinissami annaassiniarnissamilu upalungaarsimaneq nukittorsarneqassaaq, qulimiguullit infrarødinik assiliissuteqalernerisigut, taamaalilluni inunnit allanillu nunami imaanilu kissartumik qinngornerit takuneqarsinnaallutik. Tamatuma saniatigut inuttat taartumi takusaqarsinnaasunik isaruaqassapput, qaamanikitsumi unnuamilu ajornannginnerusumik isumannaannerusunillu ujaasisoqarsinnaalluni.

 

- Atortorissaarutit taakku ujaasinissami annaassiniarnissamilu upalungaarsimanermut pingaaruteqartupilussuupput, inuunermut toqumulluunniit piffissaq pingaartuummaat, Air Greenlandimi pisortaaneq Jacob Nitter Sørensen isumaqatigiissutip inissinnera nuannaarutigalugu oqarpoq.

G65A5919 Edit 3

- Pingaarnertut Illersornissaqarfimmi atortunut pisiniarnermullu aqutsisoqarfik immikkullu suliaqarnermut immikkoortortami nutaami isumaqatigiinniartuvut qutsavigerusuppakka pitsaasumik oqaloqatigiillutik isumaqatigiissut piviusunngortimmassuk.

Qangali Air Greenlandimi qulimiguulimmi H225-mi inuttanit kissaataasimavoq taamaattunik atortorissaaruteqalernissaq, taamaalilluni inuit ajornartorsiortut sukkanerusumik nassaarineqarsinnaallutik, oqarpoq nangillunilu:

- Isumaqatigiissutip inissinnera aamma unnersiutigineqarpoq, qisuariarnerullu suut tamaasa ersersippai, atortorissaarutillu atornissaannut qilanaarpugut, Jacob Nitter Sørensen oqarpoq.

 

Illersornissaqarfimmi atortunut pisiniarnermullu aqutsisoqarfimmit Oberst Klaus Qvist,  silaannakkut atortunik akisussaasoq aamma isumaqatigiissut piviusunngormat nuannaarpoq.

Klaus H. Qvist

- Naammagisimaaqaarput maanna angusarput, Kalaallit Nunaanni ujaasinermi annaassiniarnermil upalungaarsimanermik pingaaruteqartumik pitsaassutsip annertusineqarnerata pingaartup qulakkeernera, qilanaaqaagullu Air Greenland maanna taamatut piginnaasaqalernissamut atortunik pisiniarlunilu pilersitsiniarmat – suliassamillu piviusunngortitseqataallni, Klaus Qvist oqarpoq.

Atortorissaarutit pilersinniarlugit Air Greenland aamma Issittumi Sakkutooqarfik ataqatigiissaarissapput, pisariaqarfiisigut FMI ikiuuttassalluni. Naatsorsuutigineqarpoq atortorissaarutit 2025 ingerlanerani piviusunngussasut, tamakkiisumillu atulernissaat naatsorsuutigineqarpoq kingusinnerpaanik marsimi 2026-mi.

AGL 11432 Ned Dawson Air Greenland

Paasissutissat

2020-mi Air Greenland aamma Danmarkimi Illersornissaqarfik isumaqatigiissuteqarput Air Greenlandip qulimiguuliutaa B225 Kalaallit Nunaanni ujaasinermi annaassiniarnermilu atorneqartalissasoq. Qulimiguulik ujaasinermi annaassiniarnermilu atorneqartoq suliani ilungersunartuni atorneqartalissaaq soorlu Kalaallit Nunaanni Politiiinit, Peqqinnissaqarfimmit Issittumilu Sakkutooqarfimmit suliani ataqatigiissaarisumit.

 

Air Greenlandip qulimiguuliutaani H225-mi ujaasinermik annaassiniarnermillu suliaqartuupput timmisartortartut arfineq pingasut kiisalu amuartaammi sulisut arfineq pingasut, Kangerlussuaq aallaaviulluni, sulisullu ilaat nikittaallunik Narsarsuarmi qulimiguulimmi ujaasinermi annaassiniarnermilu atorneqartartumi H155 amuartaammi sulisarlutik.

 

H225-mi inuttat ullut tamaasa ukioq kaajallallugu ujaasinissamut annaassiniarnissamullu upalungaarsimasarput, ataatsikkut inuit sisamat mekanikererlu ataaseq qulimiguulimmik aserfallatsaaliisartoq. Qulimiguulik H155 Narsarsuarmiittoq pingasunik inuttaqarpoq upalungaarsimasuni ukioq kaajallallugu 8-16 upalungaarsimasartunik.

FLIR (Forward looking InfraRed)

Ujaasinermi annaassiniarnermilu EC225-mi atortut FLIR-imik ikkussineq pisinnaalersippaa. Atortorissaarut taanna FLIR Illersornissaqarfimmi arlalitsigut atorneqartarpoq  inuit nunami imaanilu kissartumik qinngorneqartut takuneqarsinnaalersillugit.

Taamaaliornikkut ujaarineqartoq pilertornerusumik nassaarineqarsinnaalluni, maannakkut periutsini atorneqartuni taamaallaat timmisartup aquttarfianit initaaniillu takusaqartorarsinnaalluni.

Inuit nunamiittut imaaniittullu takujuminaassinnaaqaat, taamaalilluni annaassiniarneq kigaannerulluni, ujaasineq namminermini sivisunerummat.

NVG – (Night Vision Goggles)

Isarussat taartumi takusaqarsinnaasut NVG Illersornissaqarfimmi arlalitsigut atorneqartarput tarrajuttumi isumannaatsumik sulisoqarsinnaalerluni.

NVG atorlugit taartumi isumannaatsumik sulisoqarsinnaavoq, inuillu ajornartorsiortut ikiorneqarsinnaallutik maannakkut atorneqartuniit pitsaanerusumik.

Taamaattumik NVG atortuuvoq pingaartoq ujaasinissami annaassiniarnissamilu patajaannerusumik ingerlatsinissami, taamaalilluni taartumi sulisoqarsinnaalluni ullumikkornit pitsaanerusumik.