4598

Air Greenlandip suliffeqarfissuata ukiumi allanngornernit angisuunit sunnerneqartumi angusat naammagisimaarnartut saqqummiuppai

 

Air Greenlandip suliffeqarfissuata 2024 allannguingaatsiarnernik sullissinermilu unammilligassanik atuiffigigaluarlugu 2024-mi angusat iluarisimaarnartut saqqummiuppai. Ukioq Kalaallit Nunaanni silaannakkut angallannermi pissutsinik nutaanik aallarnerfiusoq Nuummi nunani tamalaani mittarfiup ammarneqarnerani, aammalu angallannermut katersuuffiup nutaap atulernerani aallartilluarpoq.

 

Air Greenlandip suliffeqarfissuata 2024-mi akileraannginnermini 60,8 MDKK-t anguai. Kaaviiaatitat suliallu annertusisimapput, kisiannili aningaasartuutit suli annertusinerusimapput, ilaatigut ingerlatsinermi naapertuutinngitsunik pisoqartarnera, aammalu teknikkikkut aserfallatsaaliuinerit, toqqaannartumillu tunisassiornermut aningaasartuutit amerlineri peqqutaallutik.

 

2024-mi piffissamik eqquisinnaannginnermut aningaasartuutit 100 DKK-t angoqqippaat, Nuummilu mittarfiup tallineqarnerani akornusersuutaasut saniatigut aamma silarlunnerulernera peqqutaalluni artorsartarnerit annertusinerat takuneqarsinnaavoq.

 

Ingerlatseqatigiiffiup qulimiguuliutaasa Airbus H225 AWSAR-it marluk motooriisa ajornartorsiorfiunerat saniatigut 20 MDKK-ngajannik aningaasartuuteqarfiuvoq, pilersuisumit Safran Helicopter Engines-imit oqaatigineqartut malillugit Kangerlussuarmi sioqqat immikkut iluseqarnerat peqqutaalluni.

 

2024-mi Air Greenland sanaartukkanut pigisanut 357,3 MDKK-nik aningaasaliissuteqarpoq, maannalu qulimiguullit H125-t kingulliit tiguneqarnerini timmisartunik nutarterineq naammassivoq. Nuummi, Qaqortumi Ilulissanilu mittarfiit nutaat kingunerisaanik Air Greenland nunami namminermi timmisartuussinernik ingerlatsiinnarniarluni piffissami 2022-2026-mi katillugit 475 MDKK-nik illunut pigisanullu nalilinnut allanut aningaasaliisussaavoq.

 

2024-mi 275,0 MDKK-nik taarsigassarsisinnaatitaanermik pilersitsisoqarpoq, 2024-milu 175 MDKK-t taakkunanngaanniit ilanngaatigineqarput, aammalu 2025-mi taarsigassarsinissamut sinaakkusiussat ilaqqinneqarnissaat naatsorsuutigineqarpoq.

 

Siulersuisunut siulittaasup Malik Hegelund Olsenip aamma Group-imi CEO-p Jacob Nitter Sørensenip ukiumi angusat 26. Marsi 2025-mi siulersuisut ataatsimiinneranni saqqummiuppaat. Sulisut immikkut ittumik sulilluarsimanerat, aammalu ukiumi ingerlatsiviusumi unammillernartumi saqqummiussat tamarmiusut nuannaarutigalugit oqaatigaat.

Malik Hegelund Olsen Forperson WEB

- 2024 ukiuuvoq Kalaallit Nunaannut aamma Air Greenlandimut immikkoorutilik. 28. Novembarimi Nuummi nunani tamalaani mittarfiup ammarneqarnera killiffiuvoq pingaarutilik, ukiorpassuarni piareersaatit naammassinerinik malunnartitsiffiuinnarani, aammattaaq nunatta tikikkuminassuseqarnissaanut piffissamut nutaamut aallarniutaasoq. Sulisutta piffissami annertuunik allannguiffiusumi suliassarujussuaq naammassivaat, aammalu tunniusimanertik piginnaaneqarnertillu imaannaanngitsoq takutippaat, siulersuisunut siulittaasoq Malik Hegelund Olsen oqarpoq.

Air Greenlandip suliffeqarfissua 19. maaji 2025-mi ataatsimeersuartitsissaaq, tassanilu ukiumut piujuartitsinermullu nalunaarusiaq saqqummiunneqassaaq. Nalunaarusiaq 5. maaji 2025-mi tamanut ammasumik pissarsiarineqarsinnaasunngortinneqassaaq.