Ukiuni 15-ini uniformitoqqat atoreersut Air Greenlandimi maannakkut timmisartuutileqatigiinni sulisut qitiusut pingasut, saqisut, timmisartortartut nassatanillu tunniussisarfimmi sulisut nutaanik nutaalianillu uniformeqalerput.

Ullumikkumiit ataasinngornermi juunip aappaaniit sulisuvut nutaanik uniformeqarput, qalipaataat Air Greenlandimi timmisartunut aappalaartunut ilisarnaqisunut assingulluni, ulluinnarnilu tamatigooqisuni sulinerannut naleqqussarneqarsimasut. Uniformit ilusaat aamma immikkuullarissuteqarput, ingerlatseqatigiiffiup inuiaqatigiinni kalaallini aallaaveqarlutillu qilersorsimanerannik takussutissaasumik.

Uniformit nutaat atulernerat pivoq maanna Air Greenland ukiumi ulapaarfiunerpaap nalaani  – aasaanerani, innuttaasunit takornarianillu angallaffiunerpaasumi. Uniformit aamma takussutissaapput nunatsinni timmisartuutileqatigiit piffinnut nutaanut appakaannerannut, nunatsinni mittarfiit siulliit pingasut atuutilernerisa kingornagut.

- Angalanissamut pilersaarutit nutaat atorlugit aasaakkut timmisartuussinerput oqaluttuarisaanermi pingaaruteqartoq atuutilerpoq unammilleqatigiinnermilu inissisimaneq allanngorsimalluni. Taamaattumik angalanissamik imminut atasumik pitsaasumik migisisaqartitsinissarput pingaartuuvoq – nunatsinni nunatsinnilluunniit mittarfimmut tikeqqaarnermiit, Air Greenlandip ingerlatseqatigiiffissuani pisortaaneq Jacob Nitter Sørensen oqarpoq itisiliillunilu:

- Uniformit nutaat kinaassuserput takutiinnanngilaat, aammali ilaasutsinnik ilassinninnerput qanoq ittuunersoq takutippaat – takummaanermi, kiffartuussilluarnissamik siunertaqarluta tamatigullu isumannaatsuunissaq aallaavigalugu. Tamakku tamarmik nunatsinni timmisartuutileqatigiittut inissisimanitsinnut ata Guðrið Højgaard pput, inuiaqatigiinni pingaarutilimmik suliassaqaratta Nunatsinnut Nunatsinniillu angalasinnaajuarnissaq qulakkeerniarlugu.

Uniformit suleqatigiiaat suleqatigalugit pilersinneqarsimapput mittarfinni naalagaat, A330-mut timmisartumi naalakkat Dash-8-milu sulisut kiisalu saqisunut pisortaq suleqatigalugit. Taakkuupput pissutsini allanngorartuartuni sulinermik ilisimasaqarnerpaat, taamaattumillu atoruminassuseq eqaatsuunissarlu qitiutinneqarlutik. Uniforminik piorsaanermi ataatsimiititaliani ilaasortaasut ilaat Cabin Manager Mette Steenholdt oqaluttuarpoq.

- Uniformit timmisartumi saqisunit atoruminartuussapput qaleriisillugit atorneqarsinnaallutik, sulinerup nikerarneranut tulluartumik, ukioq qanoq iligaluarpalluunniit. Pingaartitatta ilagisimavaattaaq uniformit arnanit angutinillu atorneqarsinnaanerat – tamanut atugassiaanerat pilliutiginagu, Mette Steenholdt oqarpoq.

Ukiuni marlussunni uniforminik suliaqarneq ingerlasimavoq, aalajangiinermiit atisat atulernissaannut. Isumassarsiamiit piviusunngortitsinermi ataqatigiissaarisuuvoq Air Greenlandimi ussassaarinermi pisortaq Katja Vahl, suliniummilu killiffik nuannnaarutigalugulu oqiliallaatigeqaa.

- Suliap ingerlanerani isumassarpassuupput kissaaterpassuullutillu. Pingaarnerpaasimavorli sulisut assigiinngitsut qanoq ataatsimut nukittuumik takussutissaqalernerat – sumiikkaluaruttaluunniit, silaannarmi mittarfimmiluunniit, ilisarnaaterput pilliutiginagu, Katja Vahl aallarniilluni oqarpoq.

- Sulinitsinni unammillerneqarneq aallartinneqartoq ilisimaarilluarparput – taamaattumik aamma pingaartuuvoq takutissallugu tassaasugut Air Greenland. Timmisartuutileqatigiit aappalaartut Kalaallit Nunaanni sorlaqartut kultooritsinnilu ummateqartut, isumaqarpungalu tamanna iluatsittumik angusimallutigu, oqarpoq.

Uniforminik suliaqarneq namminermini naammassivoq – Air Greenlandimili sulisunut tamanut uniformit takkutissapput.

- Silami atisat tassaapput kavaajat ukiorsiutit aasarsiutillu, aamma immikkuullarissortallit, aasaq manna kingusinnerusukkut atulerpata iserfigiumaagassavut. Tamanna qilanaaraara oqaatigereersinnaavarali kalaallimik silap pissusaanik inuuffigisatsinnik ilisimasaqarluartoq qanimut suleqatigalugu atisat piorsarneqarsimasut, taamaalillutik aasarissumi persersumilu sulinermut naleqqullutik, Katja Vahl naggasiivoq.

- Attasit toorneerartallit - Air Greenlandip ilisarnaataanut innersuussut kusanartoq

- Qilerniusat qungasequtillu – Studio Tobias suleqatigalugu ilusilersorneqartut marlunnik qalipaatillit: aappaluttumik qasertunik toorneerallit aamma qasertunik aappaluttumik toorneerallit -

- Kjole nutaaq — nutaaliamik isikkulik kalaalerpaluttoq aappalaartunik qalipaatilik

- Paffequtit – Kalaallit Nunaanni assammik nuersakkat, kalaallisuunit isumassarsiarineqartut issittormiuunitsinnullu tulluartut.

Jakki – isikkoq atuuffialu qitiutillugit:
 Jakki aappalaartup atisalersoriaatsitsinni malunnaateqarluarnera ilisarnaatitsinnillu ersersitsilluarnerunera maluginiagassaavoq.

Jakki taanna suliffimmut tulluartuullunilu ilusilersorluagaavoq ilorrisimaarnartuullunilu.

Oqorlunilu aalassarinnarpoq timmisartumi nunamiluunniit sulillutit atoraluarukku ajorani. Air Greenlanderpalaartoq.

Suluit nutaat – kinaassutsitsinnik ersarissisitsisut
 Timmisartortartut atisaannut nutaanut ilaasutut pingaaruteqartutut, timmisartortartut ilisarnaataasa ilisimaneqarnerpaartaat nutarterusussimavarput, tassalu: Suluk
 

Timmissat Kalaallit Nunaanni assersuutaalluinnarput uagullu inuit oqaluttuarisaanerannit isumassarsiarititaasut atorlugit titartakkat pingasut suliarineqarput: tulugaq, imeqqutaalaq nattoralillu.
Siunnersuutit assigiinngitsut sulianut tunngasunut suliaqartunut saqqummiunneqarput, qularnanngitsumillu toqqarneqarpoq: Nattorallip sulua aalajangerneqarpoq nattoralittut sululik.
 

Nattoralik siulersuinermut, oqartussaanermut siammasissumillu isiginnissaanermut tunngavoq assersuutaavoq. Qutsissumut timmilluni ungasissumut isigisarpoq — soorluttaaq suleqativut silaannarmi nunamilu sulisut taamaattut.

Sulisut tamarmik suluit ilusilersornerisigut kinaassutsiminnik – aamma sumut ingerlaniarnerminnik – ersersitsisarput.