Siullermiilluni Inuit- arnat, Inuit Woman’s Summit, ataatsimeersuarnerup ingerlanneqarnissaanut atatillugu, Sisimiuni ullut 27. – 29. oktobari 2025-mi ingerlanneqartussamut, Air Greenland aamma Unuit Circumpolar Council (ICC) suleqatigiinnissamut isumaqatigiissuteqarput, ataatsimeersuarnerup piviusunngortinneqarnissaanut tapertaasussamik.

Ataatsimeersuarnermi 50-it sinnilaarlugit katersuutissapput suliassamik ilisimannilluartut, allanngortitsinermik pilersitsisartut, piginnittussaatitaasut aamma aqutsisut Kalaallit Nunaaneersut, Alaskameersut aamma Canadameersut Sisimiuniissapput, Ruslandimi Chukotkameersut internetikkut peqataassapput. Siunertarineqarpoq ilisimasanik aamma misilittakkanik ingerlatitseqqinnissaq, Inuit- arnat aamma niviarsiaqqat pisinnaatitaaffiinik siuarsaasussanik.  

Peqataasussat Alaskameersut aamma Danmarkimeersut Københavnip aamma Nuup akornanni timmisartuuneqarnissaasa saniatigut, isumaqatigiissummi isumannaarneqarpoq Nuup aamma Canadami Iqaluit akornanni immikkut timmisartuussinissaq. Tassanngaannit peqataasussat timmisartuuteqqinneqassapput Sisimiunut aamma tassanngaanniit Kalaallit Nunaannit peqataasut aallat ilagalugit.

Suleqatigiinnermut isumaqatigiissut piviusumik assersuutaavoq Nunarsuarmi Anguniakkat 17-iannut – Suleqatigiinnernik iluuseqarnissamut, tassani Air Greenland inuiaqatigiinni innutaasunik aamma nunarsuaq tamakkerlugu ingerlatsisut siuarsarniarlugit Kalaallit Nunaanni piujuartitsisumik  ineriartornissaq.

Suliffeqarfissuarmi Air Greenlandimi pisortaaneq, Jacob Nitter Sørensen, oqaaseqarpoq:

– Tulluusimaarutigaarput Inuit Women’s Summit tapersersoratsigu pingaaruteqartutut aallaaviusoq arnanik assigiissisitsinissamut siuarsaanermut aamma assigiinngisitsinermi akiuiniarnermut. Tamanna uagut inuiaqatigiinni akissussaaqataanitsinnut ilaavoq ingerlatsinernut tapertaanissatsinnut, inunnik katersuutsitsinermut suliamut taamatut ittumut, oqarpoq  nangipporlu: – Piumasaqaataasoq pingaaruteqartoq, tassa ataatsimeersuarnermut atatillugu Air Greenlandip timmisartuusiortornissaanut, tassaavoq ICC-mit uagutsinnut siusissukkut saaffiginnissuteqarnerat. Tamanna nuannaarutigaarput.

Ataatsimeersuarneq pisoq pingaaruteqartuuvoq, tamanna ICC-mit piffissami sivisuumik pilersaarusiorneqarpoq. Maannakkut piffissanngorpoq, Inuit- arnat pisinnaatitaaffinnik, toqqissisimanermik aamma sanngisuussusermik oqaluuserinninnissaat – kulturi, pissassarneq aamma atugarissaarneq aallaavigalugit.

ICC-mi siulittaasup, Sara Olsvigip, erseqqissarpaa Inuit- arnat nunat immikkoortuineersut katersuutsinneqarnissaata pingaaruteqarnera:   – Pisoq tamanna oqaluttuarisaanermut ilaavoq. Inuit- arnat aamma niviarsiaqqat aaqqissuussaasumik assigiinngisitsinermik misigitinneqartarsimapput aamma nunasiallit politikkiinik. Ataatsimeersuarneq allorniarneruvoq aaqqikkiartornissamut aamma saammaasseqatigiinnissamut, kiisalu tamanna Air Greenlandip tapersersuinerata ajornarunnaarsippaa.

Air Greenlandip saniatigut ataatsimeersuarneq suleqatigisanit arlalinnit tapersersorneqarpoq, ilaapput Folketingi, Pauktuutit - Inuit Women of Canada, Nordisk Ministerråd, Oceans North Canada aamma International Indigenous Women’s Forum (FIMI).

Piujuaannartitsinermut pisortaq, Inga Dóra G. Markussen, tassaavoq suleqatigiinnissamut isumaqatigiissumik Air Greenland sinnerlugu atsiortoq, ICC-mi siulittaasoq, Sara Olsvig peqatigalugu.

Inuit Womens Summit pillugu annerusumik uani paasisaqarit Inuit Circumpolar Council Will Convene the First Inuit Women’s Summit in Sisimiut, Kalaallit Nunaat