Air Greenlandimi pisortaaneq Jacob Nitter Sørensen aamma Icelandairmi pisortaaneq Bogi Nils Bogason Reykjavíkimi Issittoq pillugu ataatsimeersuarneq Arctic Circle Assembly ammanngitsiartoq isumaqatigiissummik codesharemik atsiorput.

Tassunga atatillugu Icelandair aamma Savalimmiuni timmisartuutileqatigiinnik Atlantic Airwaysimik isumaqatigiissusiorpoq, matumani nunat avannarliit killiit akornanni nunarsuullu sinneranut attaviit nukittorsarneqarlutik.

- Icelandairip aqqutit angallavii maannalu aamma Atlantic Airwaysimik isumaqatigiissutaat peqqutigalugit angalanissamut periarfissat eqaannerulissapput, saniatigullu nunat avannarliit killiit Issittullu tamarmiusup akornanni attaveqaatit nukittorsarneqarlutik, Savalimmiuniit Islandimiillu Kalaallit Nunaannut Canadallu issittortaanut Nunavummut. Suleqatigiinnerup taamaattup Issittumi nunanilu avannarlerni nunat immikkoortuisa atassusernissaannik anguniakkatsinnik naqissusiineruvoq, Jacob Nitter Sørensen ilaatigut oqarpoq.

Isumaqatigiissut codeshare ilaatigut isumaqarpoq, angalatitseqatigiiffiit nunat angallavigisartagaat, angalatitseqatigiiffiit suleqatigiissut ataasiakkaat tuniniaanermut nittartagaanni takussaalissasut pisiarineqarsinnaalerlutik, taamaalillutik angalasut  aallarfimminniit ornitaminnut angalanerminni angalanissamut pilersaarutaat ataasiulluni.

Icelandair annertoorsuarmik angallavinnik aqquteqarpoq, Amerikami Avannarlermi Europamilu ornigassanik attaviliisunik, Keflavik aallaavigalugu. Kalaallit Nunaata Savalimmiullu aqqutinut taakkununnga attavilernerat nunap immikkoortuinut annertuunik periarfissiivoq, Icelandairimi pisortaaneq Bogi Niels Bogason ullumi atsioqatigiinnermi oqarpoq.

- Ataatsimoorutigaarput tamatta inuiaagatta qeqertarmiut, nunarsuarmut attaveqarniarnitsinni nunatsinnilu atugarissaarnermik pilersitsiniarnermi silaannakkut angallannermik pitsaasumik pisariaqartitsisut. Nukivut kattullugit aaqqissuussamillu suleqatigiilernitsigut nunani avannarlerni Issittumilu timmisartumik attaveqaatit nukittunerulersissavavut, tamannami siunissami nunarsuup immikkoortuata taassuma tunngavissaraa pingaarutilik. Nuannaarutigaarputtaaq tuniniaavitsinni siammarterivitsinnilu annertuuni Kalaallit Nunaat Savalimmiullu Amerikamut Avannarlermut Europamullu nunarsuarmilu niuerfinnut allanut soorlu Asiamut attavilersinnaagatsigit, taamaalillutalu takornariarfissaqqissutut alutornartutut saqquminerulersillugit, Bogi Nils Bogason oqarpoq.

Atlantic Airwaysimi pisortaaneq Jóhanna á Berg aamma suleqatigiinnerup Savalimmiunut periarfissiineranut tunngasunik oqaaseqarpoq.

- Isumaqatigiissut una pingaartuuvoq, niuernikkut nunagisatsinnullu, itinerusumik attaveqalernissaq peqatigiillunilu siuariartornissaq kingunerissammagu. Aqqutit angallaffiusussat imminnut attavilernerisigut saqqumilaarnerussaagut sulissutigalutigulu, nunavut avannaakitaaniittut nunarsuarmi niuerfimmi ornigassatut saqqumilaarnerunissaat, Jóhanna á Bergi ilaatigut oqarpoq.

Aaku nunat pingasut pineqartut timmisartuutileqatigiiffiisa pisortaaneri, ukioq manna Arctic Circle Assembly Reykjavíkimi ammanngitsiartoq isumaqatigiissutip atsiornerata kingornagut, Kalaallit Nunaanni, Islandimi Savalimmiunilu aallartitat nikorfaqatigalugit.

Saamimmiit: Kalistat Lund, Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Islandimi nunanut allanut tunngasunut ministeri Thórdís Kolbrún Reykfjörd Gylfadóttir, Air Greenlandimi pisortaaneq Jacob Nitter Sørensen, Atlantiv Airwaysimi pisortaaneq, Jóhanna á Bergi, Icelandairip pisortaanera Bogi Niels Bogason, talerperlerpaavorlu Janna í Horni, Reykjavíkimi Savalimmiut aallartitaqarfianeersoq.

Ass.: Arctic Circle Assembly