4219

2024 juunip 17, ataasinngorneq

Air Greenland aamma Hurtigruten Expeditions isumaqatigiissuteqarput

Air Greenland Group aamma sinersorlutik takornariartitseqatigiiffiat Hurtigruten Expeditions periusissiornermi sinaakkutissanik isumaqatigiissuteqarput. Isumaqatigiissummi Kalaallit Nunaanni sinersorluni takornariartitsisarnermiit nalilinnik pilersinneqartunik siuarsaanissaq, aamma najukkani inuiaqatigiinni suliniutinik piujuartitsiviusunik tapersersuinissaq siunertarineqarpoq.

 

2025-mi aasaaneraniit Air Greenland Hurtigruten Expeditions sinnerlugu ilaasunik inuttanillu 7.000-it missaanniittunik Københavnip aamma Nuup, kiisalu Nuup aamma Keflavikip akornanni timmisartuussisalissaaq. Timmisartuussinerit umiarsuit takornariartitsisartut M/S Fridtjof Nansen-ip aamma M/S Roald Amundsen-ip sinersorlutik angallassineranni ilaasut inuttallu paarlaannerinut atatillugu ingerlanneqartassapput.

 

Jacob Nitter Sørensen, Air Greenland Group-imut pisortaaneq isumaqatigiissut iluarisimaartorujussuullugu oqarpoq.

Microsoftteams Image (280)

- Hurtigruten Expeditions ukiorpassuarni oqaloqatigereerluni isumaqatigiissut manna, angallavinni unammillerfiulersussani ilaasutta amerlanerulernissaannik qulakkeriffigiinnarnagu, aamma inuiaqatigiinnut sunniuteqarluartussaasoq saqqummiussinnaagatsigu tulluusimaarutigaarput. Taamaalilluni ilaasussanut taakkununnga Kalaallit Nunaanni sinersorlutik angalannginnerminni angalareernerminnilu takornariarnissamut ammaassisoqassaaq, tamannalu najukkani takornariartitsisartunut iluaqutaassaaq, Jacob Nitter Sørensen oqarpoq.

Hurtigruten Expeditions piujuartitsinermik pingaartitsisutut, aammalu umiarsuarnik akuleriissitsilluni ingerlateqarluni uumassusilinnik tunngaveqarluni ikummatissianik atuisutut, umiarsualivimmiinnerminnilu innaallagissap aqqutaanut ikkussinnaasutut ilisimaneqarpoq. Ingerlatseqatigiiffiup najukkani inuiaqatigiinnut iluaqutaasinnaanissani pingaartippaa.

 

- Hurtigruten-ip imaatigut angallassiinnarnissamit annertunerunerusumik sunniuteqarnissani kissaatigigaa malunnarpoq. Takornariat sinersortitatik aamma najugaqavissunik ilisimasaannillu atuillutik misigisaqartinnissaat pingaartippaa, najugaqavissut maani nunatsinni nalilinnik pilersitsinissaat kissaatigineqarluni, Jacob Nitter Sørensen oqarpoq.

 

Hurtigruten Expeditions-imi CEO Daniel Skjeldam nassuiaavoq, tunisassiatik takornariartitsinermik piujuartitsilluni ineriartornissamut tunngavissanut naapertuuttussaasut.

Hurtigruten CEO Daniel Skjeldam

- Air Greenlandimut isumaqatigiissuteqarnitsigut Kalaallit Nunaanni piviusunik piujuartitsiffiusunillu misigisaqartitsinissamut periusissiornitsinni killiffik pingaarutilik anguarput. Najukkani inuiaqatigiinni nalilinnik pilersitsiortornermut iluaqutaanissarput, aammalu Kalaallit Nunaata sinersorluni takornariartitsisarnermi ornigassatut pilerinartutut inissinnissaanut nukittorsaaqataanissarput qilanaaraarput. Piujuartitsineq pingaartillugu maaniippugut, Daniel Skjeldam oqarpoq.

Illuatungeriit isumaqatigiissuteqarneq malunnartillugu pingasunngornermi 19. Juunimi nal. 10.30 Nuup Umiarsualiviani sammisaqartitsissapput, tassani umiarsuaq takornariartitsisartoq M/S Fridtjof Nansen umiarsualivimmut talissimassalluni. Pingaartorsiorfiusunik oqalugiartoqassaaq, kulturimut tunngassutilinnik saqqummiussisoqassaaq, aammalu ID-kortimik takutitsisinnaasunut umiarsuaq ammatinneqassaaq. Naggataagut, aammalu minnerunngitsumik peqataasut akornanni inuit marluk sinersorlutik takornariarnissaannut, kiisalu Kalaallit Nunaanni umiarsuarmut ikiffissamut aammalu tassanngaanniit timmisartumik angalanissaannut makitsisoqassaaq.

Hurtigruten naatsumik

Hurtigruten 1893-imi pilersinneqarpoq, aammalu Norgep sineriaa sinerlugu ilaasunik nassiussanillu angallassisuulluni. 1960-imili Hurtigruten Norgep sineriaa sinerlugu takornariartitsisarnermik ineriartortitsisimavoq, 2000-imilu aamma suliani Qalasersuarmut Avannarlermut aamma Qalasersuarmut Kujallermut takornariartitsisarnermik annertusisimallugit. Hurtigruten ilaatigut umiarsuit akuleriissitsilluni teknologi atorlugu aaqqiissutissanik piujuartitsiviusuni atuinissaminik pingaartitsisutut ilisimaneqarpoq. Umiarsuit takornariartitsisartut marluk, MS Roald Amundsen aamma MS Fridtjof Nansen akuleriissitsillutik ingerlateqarlutik uumassusilinnik tunngaveqarluni ikummatissianik atuisuupput, aammalu umiarsualivinni innaallagissamik pilersuisinnaasuni ikummatissanik nunap iluaneersunik atuinermik annikillititsiniarlutik innaallagissap aqqutaanut attavilersinnaallutik.