Nuummiit Billundimut sapaatip akunneranut timmisartuussisarneq, sapaatip akunneranut timmisartuussinermik ataatsimik, Keflavik aqqutigalugu timmisartussamik ilaneqarpoq kiisalu Nuummiit Aalborgimut toqqaannartumik timmisartuussisoqartalissalluni.

Novembarip 28-ani 2024 Air Greenlandip timmisartuussinissamut pilersaarutaa nutaaq atuutilissaaq, tassani Kalaallit Nunaanni timmisartuussinerit nutaat nunanullu allanut timmisartuussinerit nutaat ilanngunneqarput. Tamanna pissaaq Nuup mittarfiata 2200 meterisut takitigisup atuutsilerneqarnissaanut atatillugu. Tamatumunnga atatillugu Air Greenland 2025-mi aasaanerani timmisartuussinissamut pilersaarummut, nutaanik marlunnik ilanngussivoq.

Piffissami 18. juni – 27. august Nuummiit Aalborgimut timmisartuussinerit sapaatip akunneranut timmisartuussinermik ataatsimik ilassapput. Piffissamilu 18. marts – 23. oktober Nuummiit Billundimut timmisartuussisarnerit sapaatip akunneranut timisartuussinermik ataatsimik ilassapput, matumuuna timmisartuussinermi Keflavik aqqusaarneqartassalluni. 

Taamaalilluni Air Greenland unammilleqatigiinnerulernerup aqqani kiisalu nunatsinniit nunatsinnullu aqqutini nukittunerulerlunilu ersarinnerulissaaq.   

Air Greenlandip pisortaanera Jacob Nitter Sørensen taama oqarpoq. 

- Aalborg – Kangerlussuaq, København aqqusaarlugu 2024-mi timmisartuussisarpugut, misissuinerpullu naapertorlugu aqqut atuisunit soqutigineqarluarpoq. Ilaasut amerlasuut toqqaannartumik timmisartuussisoqarnissaa kissaatigisimavaat, Nuullu mittarfiata ammarneqarnerata kingorna aasaanerani timmisartuussinermi toqqaannartumik timmisartuussisoqarsinnaalerpoq, Jacob Nitter Sørensen oqarpoq. 

Jyllandip Kalaallit Nunaatalu akornanni angalanissaq soqutigineqartorujussuuvoq, aamma Kangerlussuup Billundillu akornanni angalanissaq soqutigineqarluarpoq. Taamaattumik sapaatip akunneranut immikkut ittumik Nuummiit Billundimut timmisartuussisoqartalernissaa pilersaarutaavoq, Keflavikimulli aqqusaarnertalimmik. 

- Sapaatip akunneranut Nuup Billundillu akornanni Keflavikimut aqqusaartarluni timmisartuussisarnermik ilassuteqarnikkut, angalasut Amerika Avannarliup nunattalu akornanni timmisartornissamut periarfissaqalerput. Icelandair suleqatigalugu Billundip Keflavikillu akornanni timmisartumut issiaviit tuniniarpavut. Soqutigineqarnera ineriartortoq takusinnaavarput, inuppassuillu Jyllandimiit Islandimut, killormullu angalarusupput, neriuppugullu tamanna atuisunit aamma tigulluarneqassasoq, Jacob Nitter Sørensen nassuiaavoq. 

Timmisartut taakku marluk Jettime Boeing 737-800 atorlugu angalaffiusassapput, sapaatip-akunneratalu tulliani inniminnerneqarsinnaalissallutik.