Ukioq manna takornariaqarnermut nersornaat, Greenland Tourism Award, Visit Greenland aamma Air Greenland suleqatigalugit tunniunneqartoq Disko Adventuresimut tunniunneqaqqammerpoq. Tamanna Savalimmiuni takornariaqarnermut nittarsaassinermi Vestnordenimi septembarip 23-ani 2024-mi immikkut ittumik aaqqissuussinermi saqqummiunneqarpoq.

 Kalaallit Nunaanni takornariartitsisartut nersornaasiuttagaannik tunineqarnerup saniatigut Disko Adventuresip piginnittua nersornaammik, eqqumiitsuliortup Kim Kleist-Eriksenip sanaaanik, Air Greenlandimiillu 10.000 koruunit nalinganut angalanissamut tunineqarpoq.

Disko Adventures Qeqertarsuarmiippoq Danny Mølgaardimit, Naja Bjerregaardimit Mamma Steve Brobergimit aqunneqartoq, Qeqertarsuarmilu takornarianik sullissisarput. Pinngortitami misigisassarsiornerit kulturikkullu ilisimasanik takornarianut neqeroorutit immikkut sammisarpaat, Kalaallit Nunaata kulturianik pinngortitaanillu nuannersunik saqqummiussineq pingaartillugu. Akisussaassuseqarlutik takornariartitsisartutut inuiaqatigiit qanimut suleqatigisarpaat, takornariartitsinermik pitsaasumik sunniuteqartitsinissartik qulakkeerniarlugu. Anguniagaraat pitsaasumik inuttullu kiffartuussinissaq, takornariat tamarmik Kalaallit Nunaanni puigunaatsumik misigisaqartinniarlugit.

 Disko Adventures aalajangersimavoq takornarianik Kuannit nunap immikkoortuanut alianaatsumut takornariartitsiniaratik, naasut kuannit angallannerup annertusiartornerani navianartorsiortut illersorniarlugit. Taarsiullugu takornariat ungasissumut isikkivigilluinnartumut qaqqat naasullu alutornartut  takuniaaffigisinnaasaannut angalatitsisarput.Taamatut aalajangerneq aamma nunaqavissut naasunik nerisassiornermut katersuisut ataqqinninnerannik ersersitsivoq.

 Aammattaaq Qeqertarsuup naasui narlusuujunngitsut illersorniarlugit pinngortitamullu takornarianut kajungilersitsisumut sunniuteqarpallaannginniassammata Disko Adventures ATV-nut/UTV-nut aningaasaliinianngilaq.

Greenland Tourism Awardip siunertaraa takornariartitsisartut piujuartitsisumik ineriartortitsisut, isumannaatsuuneq, pitsaassuseq, avatangiisit, nutaaliorneq inuttullu akisussaassuseq pingaartillugit, nersorniarlugit.

Ukioq manna Visit Greenland, Air Greenland aamma Nalik Ventures naliliisartuupput. Ukioq manna suliffeqarfiit innersuunneqartut ataatsimut akisussaaffeqarnermik ersersitsinermikkut suleqatigiikkusussuseqarnertik ersersippaat.

Ukioq manna takornariaqarnermut nersornaammut innersuunneqartut allat tassaapput Arctic Dream, Guide in Greenland, Hotel SØMA, Authentic Greenland aamma Nuuk Water Taxi.